Жүлдемен оралды.

Сәуір айында мектеп оқушылары арасында мемлекеттік тілді үйреніп жатқан өзге ұлт өкілдеріне арналған аудандық шығармашылық байқау өткен болатын. Аталған байқаудың «Музыкалық қонақжай» және «Әдеби оқу» номинациялары бойынша мектеп алды жасындағы және бастауыш сыныптар аралығында жеңімпаз атанып, бірінші орындарға ие болған Балкашин №1 орта мектебінің даярлық топ оқушысы Султанова Вероника, «Ертөстік» балабақшасының тәрбиеленушісі Бебешко Григорий және Мәдениет орта мектебінің 4 сынып оқушысы Сивоконь Вадим облыстық турға қатысып, өздерінің білімдерімен жүлделі орындарға қол жеткізді. Султанова Вероника мен Бебешко Григорий ІІІ орынды және Сивоконь Вадим ІІ орынды иеленді. Маусымның он алтысы күні Көкшетау қаласында облыстық білім басқармасының басшысы Ізбасарова Балым Сабетовнаның қатысуымен «Қазақстан халықтар Ассамблеясы» ғимаратында осы байқаудың қорытындысы бойынша марапаттау салтанаты болып өтті. Мемлекеттік тілді үйренуші оқушыларға бірінші орынға 150 000 теңге, екінші орынға 130 000 теңге, үшінші орынға 100 000 теңге ақшалай сыйлық берілді. Жеңімпаздарымыз аудандық турдан 40 000 теңгеден ақшалай сыйлыққа қол жеткізсе, облыстық турда Вероника мен Григорий 100 000 теңге, Вадим 130 000 теңге ақшалай сыйлыққа ие болды. Жеңімпаздарымыз ақшалай сыйлық қана алып қоймай, екінші және үшінші дәрежелі дипломдармен марапатталды. Алдағы уақытта жеңімпаздарымызға әрдайым білімнің жоғары шыңынан көріне беріңдер демекпіз. Жарайсыңдар, балалар!